លោក សម រង្ស៊ីមេដឹកនាំគណបក្សប្រឆាំងបានគូសបញ្ជាក់ជាថ្មីទៅកាន់អ្នកចោទសួរ និងអ្នកគាំទ្ររបស់លោកនៅសហរដ្ឋអាមេរិកថាលោកមិនខ្លាចជាប់គុក និងមិនខ្លាចស្លាប់នោះទេហើយបើលោកជាប់គុក ឬស្លាប់អាចរំដោះប្រទេសកម្ពុជាពីក្រញាំរបស់វៀតណាមបាននោះគឺលោកសុខចិត្ត។
លោក សម រង្ស៊ី បានឆ្លើយតបទៅនឹងការចោទសួររបស់អ្នកចូលរួមជាច្រើននាក់នៅក្នុងពិធីជួបសំណេះសំណាលជាមួយអ្នកគាំទ្រនៅទីក្រុងឡូវែល សហរដ្ឋអាមេរិកកាលពីថ្ងៃអាទិត្យ។
មេបក្សប្រឆាំងដែលនិរទេសខ្លួនទៅក្រៅប្រទេសរូបនេះបានគូសបញ្ជាក់ថាក្នុងនាមជាមេដឹកនាំចលនាតស៊ូដើម្បីសេរីភាពជាតិលោកប្រាកដជាមិនខ្លាចការចាប់ខ្លួន
និងការឃុំខ្លួនទេប៉ុន្តែទាមទារថា ការចាប់ខ្លួន ឬឃុំខ្លួន ឬក៏ការស្លាប់របស់លោកត្រូវតែមានន័យសម្រាប់ជាតិ និងអាចជួយជាតិឲ្យគេចផុតពីក្រញាំរបស់វៀតណាម។ លោកថ្លែងថាលោកជ្រើសរើសយកការប្រយុទ្ធពីបរទេសមួយរយៈពេលដែលអាចជាជម្រើសតែមួយគត់ដើម្បីទទួលបានជោគជ័យចុងក្រោយ។
នៅក្នុងវីដេអូឃ្លីបដែលលោកបានដាក់ផ្សព្វផ្សាយនៅលើទំព័រហ្វេសប៊ុករបស់លោកកាលពីម្សិលមិញដែលបង្ហាញការជួបជាមួយអ្នកគាំទ្រនៅទីក្រុងឡូវែលអ្នកចូលរួមម្នាក់បានលើកសំណួរមួយទៅលោក សម រង្ស៊ី អំពីការសម្រេចចិត្តរបស់លោកដែលតែងតែរត់គេចចេញពីប្រទេសនៅពេលមានបញ្ហាជាមួយតុលាការដោយសួរថាហេតុអ្វីលោក សម រង្ស៊ី មិនហ៊ានប្រឈមមុខនឹងការចាប់ខ្លួន និងជាប់ពន្ធនាគារដើម្បីឲ្យអ្នកគាំទ្រមើលឃើញអំពីភាពក្លាហានរបស់លោក? អ្នកចូលរួមម្នាក់នេះបានលើកឡើងថា៖ «ឯកឧត្តមខ្លាចការជាប់ពន្ធនាគារ! មេដឹកនាំខ្លាចការជាប់ពន្ធនាគារគេចចេញពីប្រទេស! គណបក្សសង្គ្រោះជាតិត្រូវបានគាំទ្រខ្លាំងណាស់នៅក្នុងពិភពលោកប៉ុន្តែលោកប្រធានឲ្យតែមានបញ្ហា លោកប្រធាន តែងតែគេចចេញពីប្រទេស»។ បុរសរូបនេះក៏បានប្រៀបធៀបលោក សម រង្ស៊ី ទៅលោកស្រី
អ៊ុង សានស៊ូជី មេដឹកនាំគណបក្សប្រឆាំងរបស់មីយ៉ាន់ម៉ាផងដែរដោយថ្លែងថាលោក សម រង្ស៊ី មិនមានភាពក្លាហានហ៊ានប្រឈមមុខនឹងការឃុំខ្លួនដូចលោកស្រី អ៊ុង សានស៊ូជី ដែលត្រូវឃុំខ្លួនអស់រយៈពេល ១៥ ឆ្នាំនោះទេ។ «ហេតុដូច្នេះខ្ញុំសុំទោសពីឯកឧត្តម។ សូមឯកឧត្តមបំភ្លឺ។ កុំរត់គេចពីពន្ធនាគារក្លាហានជាប់ពន្ធនាគារប្រជាពលរដ្ឋនឹងគាំទ្រ»។
ជាការឆ្លើយតបលោក សម រង្ស៊ី បានប្រាប់អ្នកគាំទ្ររបស់លោកថាលោកមិនដែលខ្លាចការជាប់ពន្ធនាគារទេហើយថាប្រសិនបើលោកជាប់ពន្ធនាគារ ឬស្លាប់ហើយប្រទេសត្រូវបានសង្គ្រោះពីក្រញ៉ាំរបស់វៀតណាមនោះលោកសុខចិត្តជាប់ពន្ធនាគារភ្លាម។ លោកថ្លែងថា៖ «ប្រសិនបើ សម រង្ស៊ី ទៅប្រទេសខ្មែរឥឡូវហើយ សម រង្ស៊ី ជាប់ពន្ធនាគារ សម រង្ស៊ី ស្លាប់គ្មានបញ្ហាទេប៉ុន្តែបន្ទាប់ពីខ្ញុំជាប់ពន្ធនាគារបន្ទាប់ពីខ្ញុំស្លាប់សូមបញ្ជាក់ថាកម្ពុជានឹងគេចផុតពីក្រញ៉ាំយួន
ខ្ញុំនឹងយល់ព្រមភ្លាមៗ»។ មេបក្សប្រឆាំងរូបនេះក៏បានរំឭកដល់អ្នកគាំទ្ររបស់លោកផងដែរអំពីការធ្វើបាតុកម្មកាលពីអតីតកាលនៅក្នុងប្រទេសកម្ពុជាដែលដឹកនាំដោយរូបលោកនៅពេលនោះលោកត្រូវបានគេតាមប្រមាញ់ និងវាយប្រហារដោយគ្រាប់បែកដោយធ្វើឲ្យអ្នកតវ៉ា ១០‑២០ នាក់ស្លាប់នៅជុំវិញលោកហើយខោអាវរបស់លោកប្រឡាក់សុទ្ធតែឈាម។ លោក បញ្ជាក់ថា៖ «ខ្ញុំមិនភ័យខ្លាចស្លាប់ទេ។ ប៉ុន្តែការស្លាប់ត្រូវតែមានន័យមានប្រយោជន៍។ កុំស្លាប់ដោយសារចាញ់បោកគេ។ កុំស្លាប់ដោយគ្មានប្រយោជន៍។ នោះពិតជាមិនស្លាប់ដាច់ខាតទុកជីវិតការពារជាតិ»។
រូបភាពៈhttps://commons.wikimedia.org/wiki/Category:Sam_Rainsy#/media/File:Sam_Rainsy_(cropped).jpg
អត្ថបទៈhttp://www.postkhmer.com/%E1%9E%96%E1%9F%90%E1%9E%8F%E1%9F%8C%E1%9E%98%E1%9E%B6%E1%9E%93%E1%9E%87%E1%9E%B6%E1%9E%8F%E1%9E%B7/%E1%9E%9B%E1%9F%84%E1%9E%80-%E1%9E%9F%E1%9E%98-%E1%9E%9A%E1%9E%84%E1%9F%92%E1%9E%9F%E1%9F%8A%E1%9E%B8%E1%9E%90%E1%9E%B6-%E1%9E%9B%E1%9F%84%E1%9E%80%E1%9E%9F%E1%9E%BB%E1%9E%81%E1%9E%85%E1%9E%B7%E1%9E%8F%E1%9F%92%E1%9E%8F%E1%9E%87%E1%9E%B6%E1%9E%94%E1%9F%8B%E1%9E%96%E1%9E%93%E1%9F%92%E1%9E%92%E1%9E%93%E1%9E%B6%E1%9E%82%E1%9E%B6%E1%9E%9A-%E1%9E%AC%E1%9E%9F%E1%9F%92%E1%9E%9B%E1%9E%B6%E1%9E%94%E1%9F%8B%E1%9E%94%E1%9E%BE%E1%9E%A2%E1%9E%B6%E1%9E%85%E1%9E%9A%E1%9F%86%E1%9E%8A%E1%9F%84%E1%9F%87%E1%9E%80%E1%9E%98%E1%9F%92%E1%9E%96%E1%9E%BB%E1%9E%87%E1%9E%B6%E1%9E%96%E1%9E%B8%E1%9E%80%E1%9F%92%E1%9E%9A%E1%9E%89%E1%9E%B6%E1%9F%86%E1%9E%9A%E1%9E%94%E1%9E%9F%E1%9F%8B%E1%9E%9C%E1%9F%80%E1%9E%8F%E1%9E%8E%E1%9E%B6%E1%9E%98%E1%9E%94%E1%9E%B6%E1%9E%93
Post a Comment